Mbunge wa Mlimba akabidhiwa hati ya kuchaguliwa.

Posted on: October 30th, 2020

Na Islam Mposso

Pichani juu: Msimamizi wa jimbo la Mlimba Eng Stephano Kaliwa akimkabidhi hati ya kuchaguliwa kuwa Mbunge katika jimbo la Mlimba, Ndg Kunambi Emanuel Godwin.

Mbunge Mteule wa jimbo la Mlimba Ndg Kunambi Emanuel Godwin jana jioni katika ofisi za mkurugenzi mtendaji wa Halmashauri ya wilaya ya Mlimba, amekabidhiwa cheti cha ushindi kwa kuteuliwa kuwa Mbunge wa Jamhuri ya muungano wa Tanzania kupitia Chama Cha Mapinduzi.

Akizungumza mara baada ya kukabidhiwa cheti chake, Ndg Kunambi amesema kuwa anawashukuru sana wananchi wa Tanzania kwa ujumla hususan wakaazi wa jimbo hilo kwa kuweza kuiamini kwa kiasi kikubwa sana CCM kwani mpaka sasa kata zote kwenye jimbo hilo zimekwenda CCM hii inadhihirisha kwamba hata wangeingia kwenye kinyang’anyiro hicho, bado angeweza kupata kura za kutosha kuweza kuchaguliwa kuwa Mbunge.

Ndg Kunambi amesema kuwa anajua kuwa hili ni deni na akawaahidi wananchi kuwa hatokuwa na maneno mengi ila wasubiri tu waone matendo maana katika awamu hii maneno si mengi sana zaidi ya matendo.

Nae msimamizi wa uchaguzi jimbo la Mlimba Eng. Stephano Kaliwa akikabidhi cheti hicho amesema kuwa, anawashukuru wakazi wa eneo lake kwa kukamilisha uchaguzi huo kwa amani na utulivu bila kutokea rabsha yoyote ile, na akawasihi wananchi kluendelea kuwa watulivu mpaka mchakato huu utakapokwisha kabisa kwani mpaka sasa zimebakia asilimia chache tu kukamilisha zoezi zima la uchaguzi ili Rais aweze kutangazwa na wananchi waweze kuendelea na shughuli zao za kawaida.

‘’Ninawashukuru sana wakazi wa jimbo la Mlimba, kwa kukamilisha shughuli za uchaguzi katika jimbo hili kwa amani na utulivu bila kutokea rabsha yoyote, zaidi ya yote ninawasihi waendelee kuwa watulivu mpaka pale mchakato huu wa uchaguzi utakapokwishakabisa, kwani mpaka sasa zimesalia asilimia chache tu kukamilisha zoezi zima la uchaguzi ili Rais aweze kutangazwa na wananchi waweze kuendelea na shughuli zao za kawaida.’’ Alimaliza Eng. Kaliwa.

 Habari katika Picha:

picha zikionesha harakati mbalimbali kwenye utoaji wa hati ya kuchaguliwa kuwa Mbunge