Waziri wa Afya ashusha gharama za Afya hospitali ya mtakatifu Fransisi

Posted on: October 5th, 2018

Pichani juu: Waziri wa Afya, maendeleo ya jamii, jinsia wazee na watoto Mheshimiwa Ummy Mwalimu (mwenye Rasta) akizungumza na mgonjwa ambaye amepewa Rufaa kwenda Hospitali ya Mtakatifu Fransisi kutoka Kituo cha Afya Kibaoni.

Waziri wa Afya, maendeleo ya jamii, Jinsia wazee na watoto mheshimiwa Ummy Mwalimu, mapema jana ametembelea hospitali ya St Francis na kukutana na uongozi wa hospitali hiyo, na kuwataka wapunguze gharama za huduma zao kwaajili ya wananchi wanyonge wa wilaya ya kilombero, na maeneo jirani.

Akizungumza katika kikao hicho ambacho pia kiliwashirikisha mkuu wa wilaya ya Kilombero na wakurugenzi wote Halmashauri ya wilaya ya Kilombero na ya Ifakara mji, mheshimiwa Mwalimu amesema kuwa, kuna jumla ya wafanyakazi 219 kati ya wafanyakazi 312, wa Hospitali hiyo wanalipwa mishahara na serikali kiasi cha shilingi milioni 152 kwa mwezi, huku watumishi wengine 24 wakilipwa na halmashauri mbili za Kilombero, sasa kwanini huduma imekuwa ghali kiasi wananchi wa kawaida wanatozwa kiasi kikubwa cha pesa, hususani kwa wale wanaopewa rufaa kutoka kwenye vituo vya afya vilivyopo pembezoni.

Aidha kwenye mazungumzo hayo mheshimiwa Mwalimu alisisitiza kuwa mhesimiwa Rais amehuzunishwa sana na utaratibu huo na kuitaka hospitali hiyo kufuata waraka mbalimbali zinazotolewa na serikali kwa kuzingatia utaratibu unaowekwa, kwani serikali hii ni maalum kwaajili ya kuwasaidia watanzania hususan wale wanyonge walio pembezoni.

Katika hatua nyingine Mheshimiwa Mwalimu amewaamuru watendaji kumi na mbili wanaolipiwa na Halmashauri zote mbili za Kilombero, warudi kwenye kituo cha afya Kibaoni huku akizitaka Halmashauri hizo kukaa na uongozi wa Hospitali hiyo kuweza kuweka mikakati zaidi ya kuwasaidia wananchi maeneo ya Kilombero na wale walio pembezoni.

Nae baba Askofu wa jimbo la katoliki Ifakara ndugu Merkiory Libena, amesema kuwa ameshukuru kwa Mheshimiwa waziri kuweza kutembelea hospitali yao ya Mtakatifu Fransis, na kumuomba mheshimiwa waziri afikishe salamu zao kwa mheshimiwa Rais John Pombe Magufuli na kumueleza kuwa maagizo yake wameyapata na wanaanza kuyafanyia kazi mara moja ili kuweza kuendana na kasi yake, kwenye kusaidia wananchi wenye kipato cha chini kabisa nchini Tanzania.

Katika ziara hiyo Mheshimiwa Mwalimu ametembelea kituo cha Afya Kibaoni na Hospitali ya Rufaa ya Mtakatifu Fransis kabla ya kuendelea na majukumu mengine ya kitaifa.

Pichani chini: Habari picha za ziara ya waziri huyo.