Makusanyo ya Bilioni 1.66 kuvuka makadirio kwa mwaka wa fedha 2018/2019

Posted on: January 31st, 2019

Halmashauri ya wilaya ya  Kilombero  imefanikiwa kukusanya jumla ya shilingi Bilioni 1.66 kutoka katika  vyanzo mbalimbali ya mapato na kuifanya Halmashauri kuvuka lengo la makadirio  katika bajeti ya mwaka wa fedha 2018/2019 kwa miezi sita kuanzia June mpaka Desemba ambapo imepanda kwa asilimia 9 nakufikia asilimia 59 toka 50 ya awali.

Aidha katika matumizi ya pato hilo Halmashauri imeanza kuwekeza na kutekeleza miradi mbalimbali wilayani humo ambapo katika ufafanuzi wa mikakati ya kimaendeleo kupitia kamati ya fedha tayari imetumia  shilingi milioni 179 kwa kukopesha vikundi mbalimbali vya  vijana na akina mama katika maeneo tofauti wilayani humo.

Hata hivyo mkuu wa halmashauri ya wilaya ya Kilombero Chief James Ihunyo amesema vitambulisho vya wafanyabiashara wadogo kwa awamu ya pili vimetoka na kuwataka madiwani na watendaji kata kutoa elimu ya kutosha kwa wafanyabiashara juu ya umuhimu wa vitambulisho hivyo.

“Vitambulisho vya wafanyabiashara wadogo kwa awamu ya pili vimetoka viko ofisi ya mkuu wa mkoa  tunakabidhiwa hivi karibuni ili kuwasaidia hawa wafanya biashara,naomba watendaji na madiwani tutoe elimu ya kutosha ili kila mfanyabiashara ajue umuhimu wa kuwa na kitambulisho kwa maana itafika wakati hataruhusiwa mfanyabiashara yeyote kuwa na biashara ndani ya halmashauri  kama hana kitambulisho naomba fikisheni ujumbe huu”amesema Ihunyo

Ameyazungumza hayo katika kikao cha baraza la madiwani ambacho kimeongozwa na mwenyekiti wa halmashauri ya wilaya Ndugu Daud Ligazio,kimehudhuliwa na Mkurugunzi mtendaji wa halmashauri ya wilaya ya Kilombero Eng.Stephano Kaliwa, maofisa utumishi kutoka idara mbalimbali, watendaji na wananchi wote  wa halmashauri ya wilaya ya Kilombero kwenye ukumbi wa mikutano tarehe 30/1/2019 ikiwa ni sehemu ya maboresho ya bajeti ya kwa mwaka wa fedha 2019/2020