RC MALIMA AZURU MIRADI YA MAENDELEO NA KUZUNGUMZA NA WANANCHI-MLIMBA

Posted on: June 14th, 2024

Jana tarehe 13.06.2024 Mkuu wa Mkoa wa Morogoro mhe. Adam Kighoma Malima amefanya ziara Halmashauri ya Wilaya Mlimba na kukagua mradi wa ujenzi wa jengo la utawala la Halmashauri, nyumba ya Mkurugenzi wa Halmashauri, ujenzi wa barabara Itongowa, mradi wa maji safi na salama Mbingu- Igima.

Samabamba na hayo, mhe. Malima amezungumza na wananchi wa Itongowa na Mbingu kupitia mikutano ya hadhara ambapo pia amesikiliza kero zao na kuzijibu kwa kushirikiana na wataalamu kutoka TANESCO, TARURA, na RUWASA. 

Mhe. Malima amesema Serikali ya Jamhuri ya Muungano wa Tanzania chini ya Rais Dkt. Samia Suluhu Hassan imedhamiria kwa dhati kuboresha miundombinu katika Halmashauri zilizopo Wilaya ya Kilombero.

 Amewafahamisha wananchi wa Halmashauri ya Wilaya Mlimba kwamba mwanzoni mwa mwezi huu Waziri wa Nchi Ofisi ya Rais na Serikali za Mitaa (TAMISEMI) mhe. Mchengerwa alifanya Ziara ya ukaguzi wa miradi inayotekelezwa na Serikali ya Awamu ya Sita kwenye Halmashauri hii lakini hivi karibuni kabla mwezi huu haujaisha anatarajia kuja tena kwa ajili ya ukaguzi wa miradi.

Mhe. Malima amewataka wananchi wafahamu kwamba Serikali inatambua umuhimu mkubwa wa kuwa na barabara nzuri katika Halmashauri hii ambayo ni miongoni mwa Halmashauri zenye uzalishaji mkubwa wa mazao ya chakula na ya biashara kama vile mchele, ndizi, kakao na ufuta.

Nao wananchi wa Halmashauri ya Wilaya Mlimba wameishukuru sana Serikali ya Awamu ya Sita kwa utekelezaji wa miradi ya maendeleo kwenye maeneo mbalimbali ndani ya Halmashauri yao.

“Kupitia mradi huu wa maji magonjwa ya tumbo yamepungua sana kwa watoto wetu, na ndoa zetu zinaimarika kwa sababu hivi sasa wanawake hatulazimiki kuamka usiku wa manane kwenda kutafuta maji kwa ajili ya matumizi ya nyumbani” alieleza mmoja wa wananchi wa Kata ya Mbingu.

Aidha, mhe. Malima amempongeza Mkurugenzi Mtendaji na Menejimenti ya Halmashauri ya Wilaya Mlimba kwa kufanikisha miradi mbalimbali ya maendeleo ikiemo ujenzi wa nyumba ya Mkurugenzi na jengo la utawala la Halmashauri.

Amewataka watumishi wa Halmashauri hiyo wafahamu kwamba Serikali inatambua Halmashuri ya Wilaya Mlimba ni miongoni mwa Halmashauri zilizoko pembezoni hivyo waendelee kufanya kazi kwa bidii huku Serikali ikiendelea kuimarisha mazingira kwa ajili yao.

MWISHO