WALIMU WA SEKONDARI MLIMBA NA MTAALA MPYA WA ELIMU

Posted on: January 20th, 2025

TAARIFA KWA UMMA

Halmashauri ya Wilaya Mlimba inawajulisha wananchi na wadau wa elimu kuhusu mafunzo ya Mtaala Mpya wa Elimu kwa Wanafunzi wa Shule za Sekondari, yaliyo fanywa na Taasisi ya Elimu Tanzania (TET) kwa njia ya mtandao.

Mafunzo hayo yalifanyika kwa siku mbili katika mikoa ya Mbeya, Morogoro na Pwani tarehe 16 na 17 Januari 2025, ambapo walimu kutoka shule zote za sekondari za Halmashauri ya Wilaya Mlimba walishiriki kwa njia ya mtandao wakiwa katika vituo saba vilivyo teuliwa. Miongoni mwa vituo hivyo ni Uchindile, Mlimba, Masagati, Mutenga, Nakaguru na Mbingu.

Mafunzo hayo yaliyo walenga walimu wa shule za sekondari yalijikita katika mtaala mpya ambao umekusudiwa kukuza umahiri kwa wanafunzi katika nyanja mabalimbali za elimu ili kuwawezesha kujitambua na kuwa na ujuzi wa kutatua changamoto mbalimbali za kijamii na kiuchumi.

Kwa mujibu wa taarifa kutoka Taasisi ya Elimu Tanzania (TET), maboresho ya mtaala yamefanyika pia katika elimu ya ualimu, ambapo kuanzia sasa, taaluma ya ualimu haitakuwa na ngazi ya cheti. Badala yake, itaanzia ngazi ya Diploma kwa walimu wa shule za msingi na Shahada kwa walimu wa shule za sekondari. 

Aidha, walimu watahitaji kufanya mafunzo ya mwaka mmoja (internship) kabla ya kuanza kazi rasmi. Pia, walimu watatakiwa kupata Leseni ya Kufundishia kabla ya kuanzisha shughuli za ufundishaji.

Halmashauri ya Mlimba itaendelea kushirikiana na Taasisi ya Elimu (TET) na wadau wegine kuhakikisha utekelezaji mzuri wa mtaala huu mpya, na walimu wote wanaendelea kupata mafunzo muhimu yatakayo wawezesha kutoa elimu bora kwa wanafunzi.

MWISHO

Imetolewa na Kitengo cha Mawasiliano ya Serikali,

20.01.2025